Intervista e Kryetarit Ali Ahmeti në javoren “FORUM”

[Master]

1. Zotëri Ahmeti, deputetët e Partisë Suaj dorëzuan iniciativën për shpërndarjen e Parlamentit. Cilat janë arsyet bazë të këtij veprimi?

Ali Ahmeti: Për të sqaruar arsyet e dorëzimit të iniciativës për shpërndarjen e Parlamentit duhet të kthehemi në vitin 2006, kur edhe nuk u respektua vullneti politik i shqiptarëve nga ana e mandatarit të atëhershëm Nikolla Gruevski. Ne, që atëherë thamë se po instalohet një politikë dhe praktikë e keqe, se gjërat po vendosen gabim dhe se prej gjithë atyre veprimeve do të ketë pasoja dhe do të prodhohet krizë e përgjithshme. Tani jemi dëshmitar se kemi krizë të përgjithshme, institucionet nuk funksionojnë, si Parlamenti ashtu edhe Qeveria. Kishte krizë në vetë koalicionin që përbënte shumicën parlamentare, jo shit-blerje të deputetëve, jo shantazhe, kërcënime, dorëheqje kolektive, kualifikime se qeveria është “kopshti i fëmijëve”, e deri në akuza për bashkëpunëtor të Athinës, Beogradit dhe Moskës. Edhe pse ne paralajmëruan që në 2006-ën, se në Maqedoni do të ketë krizë dhe stagnim të proceseve të filluara, ne sot nuk jemi të lumtur me këtë që ndodh në Maqedoni, sepse konsiderojmë se sukseset e qeverisë janë suksese të të gjithë qytetarëve ashtu siç janë edhe dështimet. Unë këtë ia kam thënë edhe Nikolla Gruevskit, në takimin e parë që kam pasur me të në rezidencën evropiane në Shkup. Dëshiroi të theksoj se arsyet e iniciativës sonë nuk janë momentale dhe pse nuk fituam ftesë në Samitin e Bukureshtit, por ne këtë e kemi paralajmëruar që me kohë. Paralajmëruam se deri më 5 prill 2008, nuk do të ndërmarrin asnjë aktivitet që do të rrezikonte integrimin në NATO dhe se do të përkrahim çdo projekt që ndikon në marrjen e ftesës. Mos harroni, ne përkrahëm të gjitha reformat në gjyqësi dhe ligjet për harmonizim të legjislaturës së vendit me atë evropiane, kemi ndikuar në stabilitetin e brendshëm të vendit, përkrahëm hapur qeverinë e pakicës së Nikolla Gruevskit. Të gjitha këto i bëmë, për hir të interesit shtetëror dhe të integrimit në NATO, gjithashtu përkohësisht i ngrimë kërkesat tona legjitime. Pas gjithë kësaj nuk kishte se si të mos ngremë iniciativë për zgjedhje të parakohshme. Në fund të fundi iniciativa jonë bazohet edhe në politikën konsistente që ne ndjekim dhe askush nuk duhej të ishte i habitur për një veprim të tillë.

2. Opozita, partnerët e mëhershëm të koalicionit Tuaj, ishin kundër zgjedhjeve të parakohshme. Vlerësimi i tyre për iniciativën e Juaj që më vonë e përkrahu edhe pushteti, është se bëhet fjalë për strategji që do t`i pengojë proceset evro-atlantike?

Ali Ahmeti: Të ju them të drejtën jam i habitur nga qëndrimi i LSDM-së, sepse si parti opozitare parimisht duhet të jenë për zgjedhje të parakohshme. Megjithatë ai është vlerësim autonom dhe legjitim i tyre. Me këtë dëshmohet edhe një herë se ne si parti politike nuk kemi partner strategjik dhe se vendimet tona i marrin në mënyrë autonome dhe në bazë të vlerësimeve tona. Kjo në fakt i hedh poshtë edhe akuzat që oponenti ynë i bën kinse iniciativa jonë për zgjedhje të parakohshme është skenar i LSDM-së dhe Cërvenkovskit. Është për t`u habitur fakti se PDSH fillimisht ishte kundër zgjedhjeve dhe iniciativën tonë e vlerësuan si projekt antishqiptar, kurse në fund e përkrahën mbajtjen e zgjedhjeve të parakohshme. Që nëse logjikohet sipas tyre ata kanë përkrahur një projekt antishqiptar! Absurd i llojit të vet. Mendojë se ata nuk kishin zgjidhje tjetër dhe përkrahja e tyre nuk ndikojë në vendimin e fundit, sepse prej gjithsejtë 70 deputet sa e votuan, vetëm 9 ishin të PDSH-së, që do me thënë edhe pa votat e tyre vendimi kalonte. Vlerësimet se mbajtja e zgjedhjeve të parakohshme do të pengojë proceset integruese aspak nuk mbajnë, sepse ne për 18 muaj nuk kemi implementim të asnjë projekti që do të ndikonte në mbarëvajtjen e proceseve integruese, përkundrazi kemi stagnim. Kjo periudhë 18-të mujore tregoi se ky formacion nuk ka kapacitet që të udhëheq me vendin dhe të përmbush ambiciet e qytetarëve për një jetë më të mirë. Në dhjetor të vitit 2005, ne morëm statusin e vendit kandidat dhe gjasat reale ishin që në 2006-ën të fillojnë edhe bisedimet për anëtarësim në BE. Prandaj, njëri nga argumentet më të fuqishme për zgjedhje të parakohshme është edhe fakti i stagnimit të proceseve integruese. Zgjedhjet janë i vetmi mekanizëm për të konsoliduar institucionet që ata të punojnë me kapacitet të plotë për të realizuar agjendën evropiane. Nëse gjithçka shkon në rregull, mbajtja e zgjedhjeve të lira dhe demokratike, konstituimi i organeve pas zgjedhjeve duke respektuar vullnetin politik të palëve fituese te shqiptarët dhe maqedonasit dhe përkushtimi në plotësimin e kriteriumeve që kërkohen nga BE dhe NATO, është reale të parashihet që deri në fund të këtij viti të pranojmë ftesën për NATO dhe fillimin e bisedimeve për anëtarësim në BE.

3. Në këtë lidhet edhe akuza, që në fakt më tepër adresohen deri te VMRO-DPMNE-ja, se zgjedhjet e parakohshme janë atentat kundër tërësisë territoriale të shtetit. Ju si i vlerësoni këto perceptime në dëshirën e BDI-së që në zgjedhje të vërtetojë rejtingun tek elektorati?

Ali Ahmeti: Ne si parti politike, që nga themelimi në vitin 2002 e deri në zgjedhjet e fundit parlamentare, kemi dalë në zgjedhje katër herë dhe në të gjitha kemi fituar. Që do me thënë se ne kemi përkrahjen e elektoratit. Kjo i dedikohet punës sonë transparente dhe të ndershme. Ne nuk jemi në hipotekë të askujt, neve nuk na formoi asnjë shërbim sekret ose të jemi në marrëveshje të fshehta me ndonjë subjekt politik. Prandaj, ne sot dalim para elektoratit për të kërkuar mbështetjen, gjithashtu dalim me kërkesë për zgjedhje të parakohshme pa asnjë hezitim, sepse vendimet tona nuk merren në qarqet antishqiptare. Ne nuk japin deklarata para përfaqësive diplomatike ose qeverisë për t`u shitur se kemi përkrahje nga ata. Ne jemi afër popullit edhe kur jemi në pushtet edhe kur nuk jemi. Iniciativa jonë për zgjedhje të parakohshme nuk bazohet në rejtingun që ne kemi për momentin, por në arsyet që i thashë më lartë dhe nuk kanë prapavijë kundër interesave shtetërore. Vlerësim yni është se ky koalicion nuk mund të çojë vendin përpara, besoi se kjo mjafton për të shkuar në zgjedhje, duke përmendur këtu edhe mungesën e legjitimitetit të elektoratit shqiptar që i mungon këtij koalicioni. Mendoi se kjo do të jetë një leksion i mirë për të gjithë politikanët në Maqedoni që mos t`i shkojë mendja dikujt të shkel mbi vullnetin politik të shqiptarëve.

4. Meqenëse iniciativa e Juaj u përkrah nga partia më e madhe në pushtet, kurse më vonë edhe partneri i saj shqiptar PDSH, a fletë kjo për një shumicë të re parlamentare ku do të inkuadrohej edhe BDI-ja?

Ali Ahmeti: Periudha e kaluar 18 mujore është treguesi më i mirë se pa respektimin e vullnetit politik të popullit nuk mund të ketë qeveri stabile. Këtë besoj se e ka kuptuar çdo qytetar në Maqedoni e lere më politikanët që duhet të vendosin për koalicionime. Pasojat e mosrespektimit të vullnetit politik të shqiptarëve i përjetojmë të gjithë pa përjashtim. Ne jemi fortë të bindur se pa legjitimitetin e shqiptarëve nuk do të ketë sukses asnjë pushtet, këtë duhet ta kishin kuptuar tani më të gjithë pa përjashtim në Maqedoni. Mirëpo, këtë përveç politikanëve maqedonas duhet ta kuptojnë edhe politikanët shqiptar dhe të mos vrapojnë për pushtet pa pasur legjitimitetin e shqiptarëve. Jam i bindur se shqiptarët dinë të vlerësojnë se kush i përfaqëson më së miri ata dhe do të ndëshkojnë politikën që shndërrohet në vasale e politikës maqedonase. Arsyet e përkrahjes së iniciativës sonë nga ana e VMRO-DPMNE-së e kuptojë dhe arsyetoj. Gjithashtu i kuptoi edhe deklaratat e krerëve të PDSH për të përkrahur zgjedhjet e parakohshme. Mirëpo, arsyet e tyre në thelb dallojnë shumë. Nëse VMRO-DPMNE-ja dëshiron të fitojë mandat të ri, ndoshta edhe me përkrahje më të madhe, PDSH-ja nuk kishte rrugë tjetër përveç se të del publikisht në përkrahje të zgjedhjeve për të lërë përshtypjen se nuk frikohet prej tyre. Mirëpo, ky aktrim i tyre shihet qartë si në fytyrat e tyre ashtu edhe në terren. Ata tani më janë të hutuar nga ky vendim dhe mundohen që me deklarata ta mbulojnë frikën nga zgjedhjet.

5. Pyetja paraprake nuk është e ngritur vetëm si pjesë e kampanjës që e kanë filluar deputetët e LSDM-së, por edhe prej optimizmit që e paralajmëroi Nikolla Gruevski në drejtim të shpejtësisë me të cilën duhet të miratohen ligjet prioritare që të caktohet data e bisedimeve me BE. Çka nënkupton se ai shpreson në përkrahje të madhe nga përbërja e ardhshme parlamentare?

Ali Ahmeti: Më lartë thashë se cilat janë arsyet pse ne iniciuam mbajtjen e zgjedhjeve të parakohshme, që ndoshta mund të dallojnë nga arsyet e Nikolla Gruevskit. Sido që të jetë, cili do subjekt që të fitoi duhet të ketë parasysh se efikasiteti i institucioneve, veçanërisht i Parlamentit varet nga shumica që krijohet dhe seriozitetit i subjekteve që e formojnë atë. Për hapjen e bisedimeve me BE nuk mjaftojnë vetëm miratimi i ligjeve në Parlament, por edhe nga përmbajtja e tyre, implementimi i tyre në praktikë. Pastaj, Maqedonia ka edhe obligime tjera karshi komunitetit ndërkombëtar, nuk duhet të harrohet implementimi i plotë i Marrëveshjes paqësore të Ohrit. Ky koalicion nuk bëri asgjë për ta implementuar atë dokument me karakter ndërkombëtar dhe që ndërpreu një konflikt. Paramendoni tani më kur ishte e qartë se vendi shkon në zgjedhje të parakohshme, PDSH-së i kujtohet të “bëjë” marrëveshje për implementimin e Marrëveshjes së Ohrit. Kjo është e patolerueshme dhe qasje tepër joserioze për një subjekt politik dhe për një qeveri. Implementimi i Marrëveshjes së Ohrit duhet të jetë obligim i çdo qeverie pavarësisht përbërjes që ajo ka. Në sferën e përfaqësimit të drejtë dhe adekuat shifrat janë alarmante, vetëm 0,9 % rritje të përfaqësimit të shqiptarëve në krahasim me 2006-ën.

6. Ku qëndron dallimi në mes Marrëveshjes së majit të BDI-së dhe të marsit në mes PDSH-VMRO-DPMNE? Dhe sa jeni të kënaqur me realizimin e asaj për të cilën u morët vesh me Gruevskin?

Ali Ahmeti: Fillimisht më duhet të them se nuk ka Marrëveshje të Marsit. Askush deri më sot nuk e ka parë përmbajtjen e saj. Në bazë të asaj që mund të dëgjojmë nëpër prononcime të funksionarëve të PDSH-së, mund të them se ata nuk kanë bërë Marrëveshje, por kanë kopjuar dy pikat e Marrëveshjes së Majit dhe mundohen t`i përvetësojnë. Pastaj, tre nga këto gjashtë kërkesat e tyre janë pasojë e politikës së keqe dhe që kanë ndodhur gjatë kësaj qeverisje 18 mujore. Abrogimi i Ligjit për përdorimin e flamurit, kthimi i dosjeve të Hagës dhe pavarësia e Kosovës, për të gjitha këto ata si partnerë në koalicionin qeveritar duhej të kishin qëndrim dhe jo të kërcënojnë njëri-tjetrin për kërkesa dhe të mundohen të përfitojnë politikisht. Sa i takon përfaqësimit të drejtë, është për të ardhur keq se përveç propagandës kinse kanë rritur buxhetin për përfaqësimin e drejtë dhe adekuat nuk kanë bërë asgjë. Tani u kujtohet se duhet të përgatisin plan aksionar dhe të mundohen të mashtrojnë opinionin se kinse për tre muaj do të punësojnë 5000 shqiptar. Gjepura. Për të punësuar ka procedura, duhet të ketë të planifikuar buxhet. Të gjitha kërkesat e tyre duhej të bëhen në moment kur bënë marrëveshje për koalicionim dhe jo në moment kur dilet prej koalicioni. Kjo më së miri flet për qasjen e tyre ndaj Marrëveshjes së Ohrit dhe seriozitetin që kanë pasur për problemet e shqiptarëve. Jo rastësisht sot jemi në këtë gjendje të mjerueshme. Dallimi në mes Marrëveshjes së Majit dhe kësaj që propagandohet nga PDSH-ja është shumë e madhe, si na përmbajtje ashtu edhe në formë se si është arritur ajo. Marrëveshja e Majit ka gjashtë pika që në fakt kanë ngelur pa u realizuar edhe tre. Pastaj ajo Marrëveshje është arritur në prezencë të përfaqësuesve të SHBA dhe BE në Shkup dhe garantohet prej tyre. Teksti autentik i saj është në gjuhën angleze dhe secili mund ta lexojë përmbajtjen e saj.

7. Edhe çka duhet të bëhet, cilat janë ato të drejta sipas Jush që edhe më tej u janë shkurtuar shqiptarëve në Republikën e Maqedonisë?

Ali Ahmeti: Problemi nuk është vetëm në atë se edhe çka duhet të realizohet që shqiptarët të ndjehen të barabartë, por edhe qasja dhe mentaliteti i komunitetit maqedonas se ky vend është vetëm i tyre dhe se vetëm ata kanë të drejtë për të gëzuar këtë shtet. Unë e kam thënë se vendi im është Maqedonia dhe këtë nuk e them për të provokuar pjesëtarët e komunitetit maqedonas. Janë disa të drejta të parapara në Kushtetutën e Maqedonisë që garantojnë barazinë në mes bashkësive etnike, mirëpo ato të drejta duhet të ndjehen dhe sa më shumë që ato ndjehen aq më shumë rritet lojaliteti ndaj shtetit. Përveç rregullimit të përdorimit zyrtar të gjuhës shqipe duhet të rregullohen edhe përdorimi i simboleve kombëtare, të vazhdohet me decentralizimin e pushtetit, përfaqësimin e drejtë dhe adekuat dhe të tjera. Mirëpo, të gjithë duhet të pranojnë se këtu në Maqedoni kemi një realitet të ri dhe ky realitet kërkon edhe mentalitet të ri, sepse me mentalitet të vjetër nuk mund të ecet përpara.

8. Shumë analistë konsiderojnë se shteti i Maqedonisë shkon kah federalizimi. Cili është qëndrimi i BDI-së për këtë çështje? A është e mundur që të ndahet Maqedonia?

Ali Ahmeti: BDI-ja si parti ka tre prioritete të mëdha. Integrimin e shqiptarëve në shtet, integrimin shtetit në NATO dhe BE dhe implementimin e plotë të Marrëveshjes së Ohrit. Prej këtu qartë mund edhe të konstatohet se ne respektojmë integritetit territorial të Maqedonisë dhe se angazhohemi për shtetin unitar. Këtë e garanton edhe Marrëveshja e Ohrit, prandaj sa i takon çështjes së rregullimit të shtetit qëndrimi ynë është i qartë. Ne duhet të vazhdojmë të implementojmë Marrëveshjen e Ohrit, si dokument i arritur në mes palëve në konflikt me ndërmjetësim ndërkombëtar dhe i garantuar ndërkombëtarisht. Ka mendime të ndryshme sa i takon edhe organizimit të fundit territorial. Disa prej tyre shkojnë aq larg sa që këtë e cilësojnë si mundësi për ndarje ose vendosje të kufijve në Maqedoni. Mendoj se nuk qëndrojnë ato vlerësime dhe se organizimi territorial është bërë me qëllim për të realizuar të drejta etnike që dalin nga Marrëveshja e Ohrit.

9. Shqipëria është në NATO, Kosova e pavaruar, si këto ngjarje do të reflektojnë në dispononin e shqiptarëve në Republikën e Maqedonisë? Ekziston frikë se ka iniciativa nga disa tendenca publike për krijimin e territoreve gjithëshqiptare. Sa janë të mundshme kombinatorikat e tilla teritorriale?

Ali Ahmeti: Anëtarësimi i vendeve të rajonit në NATO ndikon në stabilitet dhe siguri më të madhe. Prandaj, edhe ne u angazhuam që Maqedonia të pranojë ftesë në samitin e Bukureshtit, por kjo nuk ndodhi. Mirëpo ne jemi të bindur se pas zhvillimit të zgjedhjeve të lira dhe demokratike, të pranuar nga të gjitha palët në garën zgjedhore dhe pas konstituimit të organeve legjitime që do të reflektojnë vullnetin politik të palëve fituese, në periudhën e fundit të vitit do të pranojmë ftesë për anëtarësimin në NATO dhe fillimin e bisedimeve për anëtarësim në BE. Kështu që edhe ne do t`u bashkangjitemi vendeve të Kartës së Adriatikut, - Shqipërisë dhe Kroacisë. Në mendjen e shqiptarëve nuk është krijimi i territoreve etnike, në mendjen e tyre është bashkimi në Evropën e bashkuar, ku nuk do të ketë kufij në mes shteteve tona. Ky është edhe ideal i shqiptarëve dhe këtë do ta realizojmë të gjithë së bashku.