"GJYSMA E NUMRIT TË QYTETARËVE TË MAQEDONISË MEZI E KANË MBARUAR TETËVJEQAREN

Dhjetë për qind nga gjithsej 35 mijë nxënës gjatë vitit të kaluar janë ndalur nga arsimi fillor, kurse 20 për qind nga gjithsej 26 mijë nxënës në të njëjtin vit janë ndalur nga arsimi i mesëm. Të dhënat poashtu tregojnë se 4 për qind e qytetarëve të Maqedonisë janë analfabetë, ndërsa më shumë se 10 për qind nuk e kanë të kryer tetëvjeçaren

Vedat Memedaliu

Më shumë se mbi 50 për qind e banorëve të Maqedonisë të moshës mbi 15 vjeçare mezi e kanë mbaruar shkollimin e mesëm. Pa arsim kanë mbetur gjithsej 60700 persona, arsimin fillor nuk e kanë kompletuar mbi 170mijë, kurse 549 mijë të tjerë e kanë kryer vetëm tetëvjeçaren.
Këto shifra i kanë bërë të ditur zyrtarët e Ministrisë së Arsimit dhe Shkencës të Maqedonisë (MASH), duke e prezentuar kështu Programin nacional për zhvillimin e arsimit në Maqedoni. Programi në fjalë sipas ministrit të MASH-it të Maqedonisë, Aziz Pollozhani nuk është “germë e vdekur në letër”, por një proces dhe mënyrë për përmirësimin e arsimit në Maqedoni, konkretisht uljen e analfabetizmit në vend.
“Analizat e bëra nga përfaqësuesit e Ministrisë së Arsimit të Maqedonisë dhe të dhënat që u prezentuan janë më shumë se alarmante. Këtu duhet ta kushtojmë vëmendjen më të madhe organeve vendore dhe ato ndërkombëtare që janë në Maqedoni. Arsimi duhet të trajtohet në mënyrë adekuate nga të gjithë. Gjendja e arsimit në mesin e qytetarëve të Maqedonisë është optimiste për zhvillimin e ardhshëm ekonomik dhe social të shtetit”, deklaroi ministri Pollozhani.
Statistikat tregojnë se numri më i madh i qytetarëve të papunësuar në Maqedoni participohet me personat që kanë mbaruar vetëm disa vjet nga arsimi fillor, ndërsa 10 për qind e popullatës në Maqedoni kanë të kryer arsimin e lartë dhe atë sipëror. Zyrtarët e MASH-it kanë pohuar se numri i nxënësve të cilët nuk e përfundojnë arsimin fillor dhe atë të mesëm për çdo ditë e më tepër rritet.
Dhjetë për qind nga gjithsej 35 mijë nxënës gjatë vitit të kaluar janë ndalur nga arsimi fillor, kurse 20 për qind nga gjithsej 26 mijë nxënës në të njëjtin vit janë ndalur nga arsimi i mesëm.
Ministri Pollozhani ka thënë se gjatë periudhave të ardhshme, MASH-i procesin dhe programin do ta drejtojë kah eliminimi i të gjitha mangësive dhe shkaqeve që çojnë kah mosarsimi i nxënësve nga shkollat fillore dhe ato të mesme.
Nga analizat e fundit të bëra nga Byroja për zhvillimin e arsimit në Maqedoni, është konstatuar se ata fëmijë të cilët kanë shkuar nëpër çerdhe dhe parashkollore më së paku janë të regjistruar se i ndërprejnë mësimet në shkollat fillore dhe ato të mesme.
Ministri Pollozhani ka deklaruar se për zvogëlimin e numrit të nxënësve që i ndërpresin mësimet nëpër shkolla, do të zbatohet një projektligj me të cilin do të bëhet e patjetërsueshme parashkollimi i fëmijëve nga mosha gjashtë vjeçare, pasi që deri më tani në Maqedoni, ndjekja parashkollorëve për fëmijët nuk ka qenë e domosdoshme.
Të dhënat tjera tregojnë se pothuajse 4 për qind e qytetarëve të Maqedonisë janë analfabetë, ndërsa më shumë se 10 për qind nuk e kanë të kryer tetëvjeçaren.
Konstatimet e UNESKO-s tregojnë se vetëm Shqipëria ia tejkalon Maqedonisë me shkallën më të lartë të analfabetizmit.
Në Shqipëri, sipas analizave të UNESKO-s, analfabetizmi ka arritur në 14 për qind, në Slloveni 0.33 për qind, në Bullgari 1.5 për qind, në Itali 1.5 për qind dhe në Greqi 2.5 për qind e qytetarëve.
Zyrtarët e arsimitë në Maqedoni kanë thënë se trend i rëndomtë në botë është rritja dhe zhvillimi i hapsirës për arsim.
“Në numrin më të madh të shteteve evropiane arsimi i mesëm është bërë i domosdoshëm dhe llogaritet si kufiri më i ulët i shkollimit, ndërsa në Maqedoni, akoma duhet të merremi me fushata për arsimimin e qytetarëve”, shprehet Agim Rushiti, zyrtarë i lartë i MASH-it.
MASH-i për këtë vit ka paralajmëruar se do t’i shqyrtojë mundësitë për sjellejen e një propozimligji me të cilin do të rregullohet domosdoshmëria e përfundimit të arsimit fillor. “Me sjelljen e një propozimligji për domosdoshmëri të përfundimit të arsimit tetëvjeçar, mendojmë se do ta zvogëlojmë numrin e analfabetëve në Maqedoni”, ka nënvizuar ministri Pollozhani."